Kugeza ubu urukingo “Pfizer/BioNTech” rwamaze kwemezwa ko rufite ubushobozi bwo gukingira Coronavirus ku kigereranyo cya 95%, uru rukingo rutwaye igihe gito cyane kigera mu mezi 10 mu gihe ubusanzwe kuvumbura urukingo bishobora gutwara imyaka irenga 10.
Uru rukingo rwakozwe ku bufatanye bw’Ubudage n’Ubwongereza ruzajya ruhabwa umuntu inshuro ebyiri mu ntera y’igihe k’iminsi 21, rugura amadolari 20.
Hari izindi nkingo zigeze kure zikorerwa igerageza, zirimo urwitwa Oxford Uni-AstraZeneca, rukorerwa mu Bwongereza, Moderna rurakorerwa muri Leta zunze ubumwe za America, Gameleya (Sputnik V) rukorerwa mu Burusiya.
Ku ikubitiro uru rukingo ruzatangira guterwa abantu benshi mu cyumweru gitaha mu gihugu cy’Ubwongereza, aho abakeneye cyane uru rukingo bazaruterwa vuba barimo abageze mu zabukuru ndetse n’abamaze kwandura icyorezo.
Ubwongereza bwamaze gutumiza inkingo miliyoni 40 zishobora gukingira abagera kuri miliyoni 20. Inkingo miliyoni 10 ziraboneka mu gihe cya vuba, muri zo ibihumbi 800 ziragera mu Bwongereza mu minsi mike cyane.
Minisitiri w’Intebe w’Ubwongereza, Boris Johnson kuri twitter yanditse ati “Gufata neza inkingo bizadufasha gusigasira amagara yacu, ndetse n’ubukungu bwongere kuzahuka”.
Impuguke zivuga ko nubwo gukingira bigiye gutangira, abantu bagomba guhora bari maso mu kubahiriza ingamba zijyanye no kwirinda Coronavirus no kuyikwirakwiza.
Harimo kwambara agapfukamunwa, guhana intera ahari abantu benshi, gupima abantu no gushyira mu kato abanduye.
NIKUZE NKUSI Diane
